|
Guhar
Çekîrge ya bi nasnav Çîçek Botan ku li Xakurkê
jiyana xwe ji dest da, ji bilî fermandariya wê
ya HPG
û YJA-Star endama Meclîsa PKK’ê bû. Di heman
demê de Çîçek Botan di nav refên gerîlla de wek
fermandara jin a yekemîn jî cihê xwe girt. Ji
yekîneyên gerîlla yên têkel (karma) re
fermandarî kiribû.
Di jiyana xwe ya
gerîllatiyê ya 22 salan de, di nav şert û mercên
pir zehmet de meşiya û wezîfeyên xwe pêk anî.
Endama Konseya
Leşkerî ya HPG’ê û YJA-Star Guhar Çekîrge bi
nasnav Çîçek Botan, di sala 1975'an de li bajarê
serhildanê Cizîra Botan ji dayik bû.
Yek ji wan jinên
destpêkê bû ku di sala 1989'an de di nav refên
gerîlla de cihê xwe girt. Çîçek Botan, demên xwe
yên herî bi wate li hêrêma Botanê derbas kir.
Her wiha erk û wezifeyên xwe yên herî bi wate jî
li wir pêk anî.
Gelek
fermandarên efsanewî yên Botanê mîna Rojhat
Belûzerî, Azîme Mûş, Adil Bilikî, Piling Kiçî,
Şerîf Spêrtî, Enwer Omyanûs û her wekî din jî ku
hene; Çîçek Botan, bi van fermandaran re hevaltî
kir û di têkoşîna azadiyê de milê xwe daye milê
wan û meşiyaye.
Di nav şert û
mercên zor û zehmet de ji hêzên gerîlla re
fermandarî kiriye û bi vî awayî di nav Tevgera
Azadiyê de bûye xwedî rûmet û qedirbilindiyê.
Li gorî rêzê, li
Mêrdîn, Zagros, Zap, Garê, Xakurkê û Qendîlê
wezîfe girtiye.
Fermandariya
Biryargeha Navendî ya HPG'ê di der barê jiyana
Çîçek Botan de van agahiyan dide: "Hevala me
Çîçek Botan, di nav têkoşîna azadiya jinê de
jêhatî bû ku demeke dirêj xwe li ser piya girt û
şer kir. Her weha jêhatî bû ku di asta
fermandariyê de pêşengiyê bike û bi vî awayî di
nav refên gerîlla de bibe xwedî cihekî bi rûmet,
xwedîqedir û giranbuha. Hevala me Çîçek Botan,
ji ber sekna xwe ya fermandariyê, helwesta xwe
ya di jiyan û milîtaniyê de bû endama Meclîsa
HPG'ê, endama Meclîsa YJA-Starê; her wiha bû
endama Meclîsa PKK'ê. Mirov dikare bibêje ku, bi
awayekî hêja, bi biryar û bi tecrûbeya xwe ya
mezin li van wezîfe û berpirsiyarên xwe xwedî
derketiye."
|
