|
|
Ehmed
Hesen
Dema
Îskenderê Mekedonî sefera dagirkirina Rojhilata
Navîn dikir li qiraxên derya Sipî qorsenekî dîl
digre. Ji qorsan re dibêje; tu fedî nakî ku tu
deryayê aciz dikî û tu bi va qeyîka xwe ya biçûk
diziya mirovan dikî? Qorsan ji Îskender dinêre û
dibeje: “ Ger şerm û eybek hebe ew jî ya te bi
xwe ye. Ger ez bi qeyîka biçûk deryayê aciz
dikim û ji bo nanê zarokên xwe diziyê dikim şerm
û eyîb e. Lê tu bi artêşa xwe ya talankar û bi
fîloyên xwe mezin, ne tenê deryayê, tevahiya
mirovahiyê aciz û talan dike.’’ Vêca ev karê ku
AKP’ê dike ne talan be, gelo çiye?
Gelê Kurd bi
salane ji bo bi destxistina mafê xwe yên çandî û
perwedeya bi zimanê zikmakî tekoşîna xwe
berdewam dike. Her cara ku tevgera azadiyê
xwestiye pêngaveke stratejîk bavêje.
Nijadperestên Tirk ku serkêşiya wê Erdogan û
partiya wî AKP’ê dike, bi hewldanên xwe yên vala,
pêvajoyê sabote dikin. Vêca ev karê ku AKP’ê
dike ne talan bê, gelo çiye?.
Helwesta AKP’ê
li hember zimanê Kurdî, helwesteke ku xwe bi xwe
vala derdixe ye. Derkete holê ku ka çendî AKP’ê
ji bo xepandina gelê Tirkiyê tekoşînê dike. Ji
ber di rastiyê de înkara zimanê Kurdî, înkara
dîrokê bi xwe ye. AKP’ê ji bo sêyemîn car xwe
bike desthilat û dengên xwe zêde bike,
referandom li dijî zagona 12 Îlonê li darxist.
Lê di heman demê de ji bo mijara zimanê Kurdî û
pêşxistina hindekariya Kurdî, serî li heman
zagona dide û helwestên tûnd li dijî BDP’ê nîşan
dide. Vêca ev karê ku AKP’ê dike ne talan be,
gelo çiye?
Dewleta Tirk
dibeje ku dema Kurd bi zimanê xwe biaxivin,
perçebûnê dikin, lê di heman demê û bi heman
zimanî, bi xwe diaxivin û televizyonan vedikin.
Durûtiya dewleta Tirk û zimandiziya AKP’ê
derdikeve holê ku ji asîmlasyon û xapandina
Kurdan derbas nake. Erdogan, Arinç û Mehmet
Şîmşek gelek caran di televizyonan de bi Kurdî
axifîne. Lê dema siyasetmedar û perlementerên
Kurd Bengî Yildiz, Sevahîr Bayîndir, Sirî Sakik,
Ehmed Türk û Hesîb Kaplan bi Kurdî biaxivin,
weke welat perçe bi nav dikin. Durûtî dibe, lê
ne di vê astê û ne bi va ecêba AKP’ê. Ji her
rûyî re estar çêdibê, lê ji dûritiya AKP’ê re
çav têr nake.Vêca ev karê ku AKP’ê dike ne talan
be, gelo çiye?.
Bi van kiryaran
careke din, derkete holê ku hikumeta AKP’ê, li
duv pilanên xwepandina raya giştî û gelê Kurd e.
Serokwezîrê Tirkiyê Recep Tayîp Erdogan xwedî
têgîna ku dibe her tişt ji bo AKP’ê ye. Weke ku
bi Tirkî tê gotin “Hep bana Rabbena”. Hikumeta
AKP’ê qaşo di çarçoveya vekirina Demokratîk de
xwestibû hind pêngavan bavêje. Lê derkete holê
ku gavên çawa dixwazê bavêje. Di serî de
vekirina Televizyona TRT 6 û vekirina beşê
Kurdolojiyê li hin zanîngehê Tirkiyê de, di
çarçoveya pilana dewleta Tirk e ku dibin siya
AKP’ê de pêk hatiye.
Kampaya ku ji
aliyê BDP’ê ve hatiye destpêkirin ji bo zimanê
Kurdî, pêngaveke erênî û li gor demê ye.
Pêngaveke ku yekîtiya civakî li Tirkiyê bi
hêzdike. Pêngavên bi vî rengî, ne tenê wê
Kurdan serfiraz bike, hemû kêmnetewên din yên li
Tirkiyê serfiraz dike. Di daxuyaniya hevserokê
BDP’ê Seleheddîn Demîrtaş, ev yek bi zelalî
derkete holê. Li Tirkiyê çendî pir zimanî hebe,
wê bi qasî wê jî aramiya civakî hebe.
Weke encam ger
peyv û hevoka Kurdî li Tirkiyê, li gor hikumeta
AKP’ê cûdaxwazî bê, li gor gelê Kurd ev
cûdaxwazî eyba Tirkiyê ye. Ger li gor AKP’ê
rojev dagirkirine, li gor gelê Kurd diyar kirina
rojeva Tirkiyê ya rasteqîn e. Ger li gor
zihniyeta faşîzane daxwaza perwerdeya Kurdî û bi
navkirina hemû amûrên jiyanê bi Kurdî perçebûna
Tirkiyê be. Îsrarkirina di yek netew, yek ziman
û yek al de jî perçebûna bi tevahî mirovahî û
civakê ye. Têgîneke wiha ku ji berhema zihniyeta
faşîzane hatiye afrandin, aloziyê diafrîne.
Ger axaftina bi
zimanê Kurdî, li gor îddayê AKP’ê tewan e,
înkarkirina netewekî û ji holê rakirina çand û
zimanê civaka Kurd jî, înkara dîrok, çand û
civakbûna Tirkiyê bi xwe ye. Ev jî şermeke
mirovahiyê ye.
|
