PAJK ji bo pêvajoya nû amade ye
 

Endama Meclîsa Partiya Azadiya Jinên Kurdistanê (PAJK) Ferîde Alkan got; "Rakirina şert û mercên esareta li ser Rêber Apo ji bo gelên me û jinan tê wateya azadiyê. Ji ber wê jî me têkoşîna xwe ya sala 2011 daye rakirina şert û mercên dîlgirtinê yên li ser Rêber Apo”. Alkan ragihand ku ew bi biryar in ku li her qadê ji bo vê yekê têkoşînê xurt bikin.

Endama Meclîsa Partiya Azadiya Jinên Kurdistanê Ferîde Alkan nêrînên xwe yên derbarê 5. Komcivîna Koma Jinên Bilind (KJB) û pêvajoya li pêşiya me de vegot. Alkan, diyar kir ku di Komcivînê de plansaziyên têkoşînê hatine destnîşankirin. Alkan ragihand ku bi vî awayî, ji bo jinên Rojhilata Navîn û Kurdistanê perspektîfên têkoşînê hatine zelalkirin, her wiha peywira hemû sazî, rêxistin û endaman hatiye aşkerekirin.

Alkan diyar kir ku têkoşîna azadiyê ya 40 sal in di bin pêşengiya Rêberê Gelê Kurd Abdullah Ocalan de tê meşandin, li Rojhilata Navîn rê li ber Bihara Gelan vekiriye û got; “Serhildanên gel ên li Bakûrê Efrîkayê dest pê kirin û li gelemperiya Rojhilata Navîn belav bûn, têkiliya xwe bi têkoşîna me ya 40 salan a bi pêşengiya Rêberê Apo tê meşandin re heye û ev yek emcamên vê têkoşînê ne.”

Divê têkoşînên jinan hevparbin

Alkan destnîşan kir ku hemû jinên cîhanê li her deverên cîhanê xwediyê heman çarenûsê ne û ragihand ku ji ber vê yekê di Komcivînê de yekgirtin û hevpariya hemû tevger û rêxistinên jinan ên li Cîhanê hat gotûbêjkirin. Alkan got; “Divê komcivîna me de, hat gotûbêjkirin ku divê Tevgera Azadiya Jinên Kurdistanê ji bo hevparî û yekgirtina têkoşînên jinan tevbigerin, her wiha di warê polîtîkî û bîrdozî de tişta ku dikeve ser milê wan pêk bînin û ji bo vê yekê têbikoşin.” Alkan destnîşan kir ku ji bo careke din pirsgirêkên weke di konferansa jinan a li Venezulayê de derketibûn, dubare nebin, divê jinên Kurdistanî li her qadê ji bo hevparî û yekgitina têkoşînên jinan, rol bileyîzin û bal kişand ku wana di komcivînê de jî di der barê vê yekê de gotûbêj kirine.

Biryarên girîng ên Komcivînê

Alkan destnîşan kir ku biryarên komcivînê di çarçoveya feresata “Em bi Nasnameya PAJK’ê Bihara Gelan Pêşwazî bikin, Dîlgirtina li ser Rêber Apo rabikin” de hatine girtin û di der barê biryaran de wiha axivî:

“Em ê di vê nîva sala 2011 de bi nansmaeya PAJK’ê kûrbûna di warê partîbûna jinê de, bi nasnameya PAJK’ê pêşengiya herî rêxistinkirî ya şoreşên gel ên demokratîk ku bi awayek lezgîn li Kurdistan û Rojhilata Navîn berdewam dikin, bikin, li ser vî bingehî em ê li her qadê têkoşînê radîkal bikin, bi vî awayî em ê bi rakirina esareta li ser Rêber Apo pêşwazî bikin. Wê jin di serhilanên li Bakûrê Kurdistanê û Tirkiyeyê de pêşengiya asta herî jor bikin. Ligel vê jî wê beşdarbûna siyasetê were bibandortirkirin û çalaktirkirin. Her wiha wê li her derê li hemberî tundiya li dijî jinan li ser bingehê parastina rewa têkoşîn were meşandin. Her wiha wê ji bo pêşxistin û parastina ziman, çand û nasmaneya me, li ser bingehê xurtkirina rêxistinbûnê, helwesteke siyasî were girtin û wê jin li gorî wê tevbigerin. Wê jin ji bo çareseriya li ser bingehê Xweseriya Demokratîk rola pêşeng werbigire. Dîsa li ser vî bingehî wê ji bo pêşxistina jinan, xebatên akademîk, xurtkirina hişmendiya jinan pêngav bêne avêtin, wê li ser bingehê têkoşîneke hevpar a ligel jinên Tirkiyeyî, lez bide xebatên xwe yên têkoşînê. Her wiha ji bo serhiladanên gel a li Rojavayê Kurdistanê û Sûriye, Başûrê Kurdistanê, Rojhilatê Kurdistan û Îranê, biryar hat dayîn ku jin bi awayek herî xurt beşdarî xurtkirina têkoşînê bibin. Her wiha ji bo lezdayîna pêvajoya di sala 2010 de ji bo Konferansa Netewî ya Jinan a ji aliyê tevgera me ve hatibû destpêkirin û her wiha ji bo ku jin bikaribin di pêkanîna Konferansa Netewî ya Kurdan de rola pêşeng bileyîzin, biryar hatin girtin. Dîsa ji bo lezdayîna xebata ji bo komcivîna hemû jinên cîhanê ku tevgera me di sala 2010 de bi belavkirina danezanekî dabû destpêkirin, ji bo yekgirtin û hevpariya têkoşîna jinan a li gelemperiya cîhanê biryar hatin dayîn ku xebatên dîplomasî werin xurtkirin. Ji bo parastina hebûna xwe û gelê xwe ya li hemberî polîtîkayên tunekirinê û ji bo pêkanîna azadiyê li ser bingehê parastina rewa û ji bo vê jî mezinkirina artêşa jinan, ji bo xurtkirina temînata têkoşîna me ya azadî û demokrasiyê biryar hatin wergirtin.”

Enî bereya şoreşê ye

Alkan destnîşan kir ku em ji bo çareserkirina pirsgirêka Kurd ketine pêvajoyeke girîng û diyar kir ku êdî dem dema pêkanîna çareseriya bi Xweseriya Demokratîk e. Alkan derbirî ku êdî ev yek mîsoger bûye û wiha domand: “Ne AKP, ne DYA, ne Îran û ne jî desthilatiya BAAS a Sûriyeyê, nikare bi tu awayî vîna gelê me ya ji bo azadiyê bişkîne. Kurdan êdî xelekên înkar-îmhayê şkandine. Polîtîkayên parçakirina Kurdan û geşkirina pevçûnên di nava Kurdan de êdî îflas kirine. Bedela wê çi be, bila bibe, gelê Kurd êdî ji bo xurtkirina têkoşîna netewî biryar daye. Herî dawî, xwedîlêderketina li cenazeyên gerîlayan a li Qilabanê piştrast dike ku ev yek di asta herî jor de pêk hatiye. Komcivîna me sond xwariye ku bi dilsoziyeke mezin peywira xwe ya pêşengiya dayik û hemû gelê bi serkeftî pêk bîne. Pêvajoya 4'emîn a ku me di 1’ê Pûşpera 2010 dabû destpêkrin, wê di sala 2011 ji bo çareseriyê vegere pêngavên li ber çavan. Ji ber wê jî hilbijartinên li Tirkiyeyê girîng bûn. Eniya Ked, Demokrasî û Azadiyê xeyalên eniya Şêx Seîdan, Seyît Rizayan, Mustefa Sûphiyan, Denizan, Mahîran, Îbrahîman, Kemal Pîran, Mazlûman, Mûsa Anteran wergerandiye rastiyê û giyanê wan da zindîkirin. Wê ev enî rê li ber têkoşîna şoreşger a demokratîk ya gelên Kurdistan û Tirkiyeyê ve bike.”

Alkan, diyar kir ku wekî Tevgera Azadiya Jinê ya Kurdistanê ji bo pêvajo ser bikeve peywira pêşengetiyê ji xwe re wekî helwestekê dibînin û ev tişt lê zêde kir: “Bila gumana tu kesî nemîme ku ji bo vê ji her demê bêhtir em ê bibin xwedî têkoşînek xurtir, radîkaltir û berfirehtir.” Alkan, destnîşan kir ku ev pêşveçûn hemû saya Rêberê Gelê Kurd Abdullah Ocalan derketine holê û wiha pêde çû: “Lewma azadiya Rêber Apo ji bo gel û jinan tê wateya azadiya bingehîn. Ji ber vê yekê me di têkoşîna sala 2011’an de azadiya Rêber Apo wekî peywira esas daniye ber xwe.”

Alkan, di berdewama axaftina xwe de anî ziman ku ji bo vê jî di her qadê de xwedî helwesta xurtkirina têkoşînê ne û ev tişt gotin: “Ez di wê baweriyê de me ku wekî 5’emîn Komcivîna Giştî a me jî pêşdîtî kiriye êdî dema azadiya Rêber Apo hatiye. Sala 2011’an ku dê bibe sala têkoşîneke bêhempa, ji bo gele me jî dê bibe sedema gelek pêşveçûyinan.