|
Di
dîroka cîhanê de ku mînakek wê nehatiye dîtin
komploya navneteweyî li hemberî Rêberê Gelê Kurd
pêk
hat. Ev komploya ku DYE, Îngilistan û Israîl di
navenda wê de bûn, komployek li hemberî
Rojhilata Navîn bû. Di serî de li Tirkiye û
Rojhilata Navîn kesên ku nedixwestin demokrasî û
azadî pêş bikeve ev komplo pêk anîn. Ji ber ku
li Rojhilata Navîn Rêberê Gelê Kurd ji bo xwe
astengiya herî mezin didîtin, xwestin veder
bikin. Destûr nedan ku Rêberê Gelê Kurd li tu
welatan bimîne. Çimkî dizanin ku Rêbertî li ku
derê be jî dê Têkoşîna Azadiyê bi pêş bixe. Ji
ber vê jî an îmha bikirina an jî bixistina
girtîgehê. Ji bo bigihîjin armanca xwe ew
teslîmî Tirkiyeyê kirin. Pergala îşkenceyê ya
Îmraliyê ji bo di warê îdeolojîk, siyasî û
fîzîkî de Rêberê Gelê Kurd tune bikin, ava kirin.
Ev komploya li
hemberî Rêberê Gelê Kurd di heman demê de gelê
kurd li Rojhilata Navîn trajediya dijî çawa ye
bi her awayî raxist ber çavan. Kesên ku ev
komplo fêm kirine û derxistine hişmendiyê baş
dizanin ku kurd li Rojhilata Navîn zilmeke çawa
dijî û dibe qurbaniyên kîjan berjewendiyan.
Hişmendiya komployê di heman demê de hişmendiya
ku kurd çawa têkoşînê bimeşînin e. Qasî vê
komployê tu bûyer tune ku kurd hişmendiya siyasî
ew qas pê re çêbibe. Belkî gotina ku musîbetek
ji hezar gotinî çêtir e ji bo bûyerên bi vî
rengî hatibe gotin.
Derxistina
komployê ya hişmendiyê, kurd ji rewşa berê hêj
polîtîktir û xurtir kiriye. Gotina Rêberê Gelê
Kurd “Pêkutî û zilma nakuje xurtir dike” vê
komployê ev gotin piştrast kiriye. Gelê kurd û
Tevgera Azadiya Kurd ku li hemberî vê komployê
çong neda erdê û serê xwe netewand hêj xurtir
bûye. Rêberê Gelê Kurd hêza xwe ya siyasî û
ramanê qat bi qat zêdetir kiriye. Bi vî rengî
gotina ku di parêznameyên DMME’yê de gotiye
“komployên dîrokî pêşketinan ranawestîne,
lezgîntir dike” îspat kiriye. Kesayet û
têgihiştina siyasî, îdeolojiya ku Rêbertiyê di
bin îşkenceya Îmraliyê de kemilandiye, ne tenê
li ser pêşeroja gelê Kurdistanê, pêşeroja
Rojhilata Navîn jî sedsalan dê bandor bike.
Rêberê Gelê Kurd
parêznameyên xwe weke parêznameya Rojhilata
Navîn bi nav kiriye. Parêznameya xwe ya dawî jî
weke parêznameya li dijî kapîtalîzmê bi nav
kiriye. Ew kûrahiya ku di tevahiya van
parêznameyan de gihîştiyê, komplo bi derxistina
hişmendiyê re eleqedar e. Di dîrokê de pêkutî,
zilm, zindan di vê astê de ji bo civaka xwe û
mirovahiyê kesekî ku ew qas xwe xurt kiriye
nehatiye dîtin.
Di salvegera
13’emîn de tê xwestin ku komplo dîsa were
pêşxistin. Tecrîda du meh û nîv e ya li Îmraliyê
mirov nikare wekî bûyer an jî kirûyekê bes
astengkirina hevdîtinan binirxîne. Bi şantaj û
pêkutiyên li ser Rêberê Gelê Kurd li hemberî
Tevgera Azadiya Kurd şer hatiye îlankirin.
Îmralî jî bûye wekî navenda vî şerê tê meşandin.
Tê xwestin ku îradeya gelê kurd û Tevgera
Azadiya Kurd bi şer û komployên ku li ser
Îmraliyê tê birêvebirin bê şikandin. Tê fikirîn
ku Tevgera Azadiyê û gelê kurd bi
xwedîlêderneketina li Rêberê Gelê Kurd vîn û
îradeya wan were şikandin.
Tê zanîn ku di
dîroka Kurdistanê de bi darvekirina pêşeng û
serokên kurdan, bi qetilkirinan serhildanên gel
hatine tepeserkirin û bi vî awayî îradeya gel
şikandine. Ji ber van sedeman li hemberî
kompolya ku ji Îmraliyê tê rêvebirin têkoşîn û
şer tê wateya şer û têkoşîna ji bo îradeyê. Ev
şer şerê biserxistina azadî û demokrasiyê ye. Di
cîhanê de tu gel bêyî ku li serokatiya xwe xwedî
derkevin nikarin di têkoşîna azadî û demokrasiyê
de bi ser bikevin. Ev di dîrokê de bi dehan
caran hatiye îspat û qehîmkirin.
Di pêvajoya
Komploya Navneteweyî de gelê kurd biçûk, mezin
bi awayekî ku tu kesekî jî texmîn nedikir rabûbû
ser piyan. Bi dehan kes bedenên xwe kirin
xelekên ji agir û li dora serokatiya xwe
barîkatên parastinê bi awayekî fedayiyane ava
kirin. Ruhê berxwedana ‘Hûn nikarin Roja me tarî
bikin’ bû haveynê têkoşîna demên borî jî. Gelê
kurd û Tevgera Azadiyê ya Gelê Kurd ji ber ku bi
vê ruhê li serokatiya xwe xwedî derket komplo bi
ser neket û têk çû. Ji ber van sedeman têkoşîna
ji bo azadî û demokrasiyê di 13 salên borî de
her tim pêş ket. Îro roj ger ku gelê kurd di
têkoşîna azadî û demokrasiyê de nêzî serkeftinê
bûbe, sedema vê ya sereke ew e ku bi hewldanên
Rêbertiya Gelê Kurd pûç derxistina vê komploya
gemar û qirêj e.
Çawa ku komploya
yekemîn hat pûçkirin, tu şik û guman tune ku ew
ê komploya duyemîn jî pûç bê derxistin. Dema ku
komploya duyem pûç bê derxistin jî dê gelê kurd
bigihîje meqsed û miradê xwe yê jiyana azad. Ji
bo vê yekê jî divê li dora serokatiyê yekitiyeke
xurt were afirandin û asta têkoşînê were
bilindkirin. |
