‘Heta agirbesta du alî nebe, hevdîtin jî çênabin’

 

Endamê Konseya Rêveber a KCK’ê Cemîl Bayik diyar kir ku AKP çeka dawî ya sîstema dagirker e û ragihand ku heta daxwazên Ocalan û agirbesteke du alî pêk neyên, hevdîtin jî çênabin.

Endamê Konseya Rêveber a KCK’ê Cemîl Bayik bersiv da pirsên ANF’ê yên der barê tecrîda li ser Ocalan, operasyonên siyasî yên li hemberî BDP’ê û nirxandinên girîng kir.

Tecrît armanceka şer e

Bayik bal kişand ku ji 27’ê tîrmehê ve hevdîtina ligel Rêberê Gelê Kurd Abdullah Ocalan hatiye qedexekirin û got; “Ev tecrîd ligel ku hesasiyetên Tevgera Azadiya Kurdan û gelê Kurd tê zanîn jî tê meşandin. Ji gelê Kurd re tê gotin ‘hûn ne civak in, hûn ne gel in, rêberek ê we yê ku hûn ê xwedî lê derbikevin jî divê tune be”. Ev bi awayeke pir aşkere armaceke ya şer e li hemberî gelê Kurd.

Bayik got; “Li hemberî hikûmet û dewleteke ku helwesteke wiha nîşanî gelekî didin, mafê wî gelî heye ku ji bo Tekoşîna Azadiyê hemû cure berxwedanan li dar bixe.”

Ger agirbesta du alî nebe, hevdîtin jî çênabin

Bayik der barê ji nû ve destpêkirina hevdîtinên di navbera PKK û dewletê de jî wiha axivî; “Ji niha û pêve wê Tevgera Azadiya Gelê Kurd li hemberî nêzîkatî û tevberên hikûmeta AKP’ê baldartir be. Bi qasî ku ji AKP’ê tê bila polîtîkayên xwe yên tecrîdê bimeşîne, bi qasî ku jê tê bila êriş bike, lê heta daxwazên Rêberê Gelê Kurd neyên pêkanîn û agirbesteke du alî pêk neyê, hevdîtin jî çênabin.”

AKP çeka dawî a pergala dagirkeriyê ye

Bayik got; “AKP çeka dawîn a sîstema dagirker û sîstema înkarkirina Kurda ne” û wiha domand; “Di encamê de wê hikûmeta AKP’ê bin bikeve û wê êdî bi awyaeke neçarî pirsgirêka Kurd bi riyên diyalogê were çareserkirin. Ligel binketina AKP’ê sîstema dagirker û înkarker jî nema êdî xwe li ser lingan digire.

Bayik got; “Ligel binketina AKP’ê wê pirsgirêka Kurd li ser esasê çareseriyeke demokratîk çareser bibe û wê êdî demokratbûna Tirkiyeyê jî pêk were.”

Komploya 9’ê cotmehê bin ket

Bayik 13. Salvegera Komploya Navnetewî ya ku di encama wê de Rêberê Gelê Kurd Abdullah Ocalan ji Sûriyeyê derket jî nirxand û got; “13 sal bi ser komploya navnetewî re derbas bûn. Em dikarin bi rehetî wiha bibêjin; Komploya Navnetewî ya ku di 9’ê cotmeha 1998 de bi derketina Ocalan ji Rojhilatanavîn re dest pê kir, bin ketiye. Weke ku Rêber Apo di parêznaemya xwe ya ji bo DMME’yê de gotî; ‘komployên dîrokî rê li pêşketinan nagirin, lezgîntir dikin’ ev yek jî di pêvajoya 13 salan de aşkere bûye. Bê guman sedemê binketina komployê sekin û berxwedana Rêber Apo, Gelê Kurd û Tevgera Azadiyê ye.”

Bayik diyar kir AKP hewl dide piştî Komploya yekemîn a Navnetewî bibe aktorê komploya duwemîn û got; “Di vê komploya nû ya navneteweyî de DYA jî heye. AKP ji bo Tirkiyeyê li Rojhilatanavîn ji xwe re bi kar bîne, piştgirî dide Tirkiyeyê. Ji bo komploya duwemîn bi ser bikeve, AKP me hûn gotinên DYA’yê bi cih tîne, her wiha li herêmê ajantiya DYA’yê dike. Ji ber wê jî ne şaş e ku mirov tecrîda li ser Rêber Apo duwemîn a DYA’yê pênase bike.”

Bayik got ku divê di 13. Salvegera Kompoloya Navnetewî de, ji hemû demê zêdetir li Ocalan xwedî derbikevin û got; “Divê gelê me li hemberî van êrişan nîşan bide ku ew ê xwedî li Rêbertiyê derbikevin. Her wiha divê lîstokên AKP’ê têk bibin. Divê gelê me AKP’ê ji ber van pêkanînên wê poşman bike."

Polîtîkaya tasfiyekirinê a bi navê KOOd pêşîlêvekirin

Bayik got ku polîtîkaya AKP'ê bi navê pêşîlêvekirina demokratîk, polîtîkayekî tasfiyeyê ye û wiha domand: "Polîtîkaya tasfiyeyê di bin navê qod pêşîlêvekirina demokratîk hatiye meşandin. Tiştên piştî vê gotinê hatine kirin tenê operasyonên kirkirina çandî ne. Tengkirina qada siyasetê ya kurdan e û zêdekirina operasyonên leşkerî ne.Bi vê polîtîkayê hatiye xwestin ku Tevgera Azadiya Kurd, bê têkbirin û tengkirin.

Bayik destnîşan kir ku van poîtîkayan piştî hilbijartinê zêdetirê xwe dane nîşandan û ev tişt lê zêde kir: "Cihekî ku evqas operasyonên qirkirina siyasî hene, hûn nikarin behsa siyaseta demokratîk bikin. Di bin ronahiya vê rastiyê de qala çareseriyê kirin jî tê wateya henekan. Mafê tu kesî tune ye ku bi gelê kurd re henekên bike. Piştî van girtinan, êdî tu wateya hilbijartin û siyaseta demokratîk nemaye. Lewre piraniya kesên hatine hilbijartin niha girtîm ne. Ji Geverê heta Pirsûsê gelek şaredar hatine girtin. Rêya çareseriyê girtin û şantaj nîne. Divê pêşiyê ji bo çareseriyê ji vîna aliyan re rêz bê girtin. Teqez tu eleqeya girtinan bi PKK an jî KCK'ê tune ye. Tênê kurdên ku çareseriya demokratîk diparêzin û xwedî hesasiyet in tên girtin. Li hemberî vê jî berxwedan divê. Ev berxwedan rewa ye. Rewa ye ev êrîş bibin hinceta xurtkirina serhildanê. Heta divê rê neyê dayîn ku ev girtin û binçavkirin pêk bên.

Bertekên BDP’ê ya li hemberî binçavkirinan kêm e

Bayik helwesta BDP'ê ya li hemberî binçavkirinan rexne kir û got ku helwesta wan kêm e. Bayik, di vê çarçoveyê wiha axivî: "Helwesta BDP'ê têrê nake. Evqas endam û rêveberên wan hatine girtin, ew bertekên ji rêzê nîşan didin. Gelo dibe ku ewqas li hemberî van girtinan bêdeng bimîne. Ev hînbûna girtin û binçavkirinan e. Pêwîst e ku parlementer jî qiyametê rakin. Ne bi tenê cihekî divê li her derê bertek bên nîşandan. Dema em bêjin Wanê binçavkirin çêdibin, bila bi hemû navçeyên wê bi hev re bertek nîşan bidin. Ger li Qoserê çêbû bila hemû Kurdistan rabe ser piyan. Divê hemû kes xwedî li hev derkevin. Cihê ku evqas girtin hene, wê derê faşîzm heye. Faşîzm jî tehemûlê nîşanî muxalefetê nade."

Bayik, derbarê pêvajoya çêkirina makeqanûna nû de jî axivî û ev tişt gotin: "Di dema pêşiya me de dibe ku meclîs bibe qadekî têkoşînê ya girîng. Gelê kurd li benda vê ye. AKP niha dixwaze makeqanûnek nû çêke, lê diyar e ku ev nabe makeqanûnek demokratîk. Tu niyetên AKP'ê yên wisa tune ne. Divê di serî de BDP'ê, hemû hêz vê rastiyê bizanin. Meclîs jî qadekî siyaseta demokratîk e."